د کابل پولي تخنيک پوهنتون او افغان نړيوال اسلامي پوهنتون ترمنځ د ګډو همکاریو هوکړه ليک لاسليک شو
په همدې مناسبت جوړو شوې غونډه کې د کابل پولي تخنيک پوهنتون عمومي رئيس مولوي محمد موسی فاروق د کابل پولي تخنيک پوهنتون د تاريخچې، علمي مقام، نړيوالې درجه بندۍ (رېنکينګ)، لابراتوارونو، پوهنځيو او نورو علمي او اداري برخو په اړه هر اړخيز معلومات وړاندې کړل.
نوموړي د ياد هوکړه ليک لاسليک د علمي همکاريو د پراختيا په ځانګړي ډول د انجنيرۍ په برخه کې يو مهم او ارزښتناک ګام وباله او ويې ويل چې دغه هوکړه ليک به د دواړو پوهنتونونو د استادانو او محصلانو ترمنځ د علمي تجربو د تبادلې لپاره اغېزمنه زمينه برابره کړي.
د کابل پولي تخنيک پوهنتون عمومي رئيس همدارنګه د افغان نړيوال اسلامي پوهنتون د نوې تأسيس شوې علمي ادارې په توګه يادونه وکړه او د انجنيرۍ په بېلابېلو برخو کې يې د هر اړخيزې همکارۍ ډاډ ورکړ. نوموړي هيله څرګنده کړه چې هغه بهرني استادان چې افغان نړيوال اسلامي پوهنتون ته د تدريس او علمي همکارۍ لپاره بلل کېږي، خپلې علمي او مسلکي تجربې دې د کابل پوليتخنيک پوهنتون له استادانو او محصلانو سره هم شريکې کړي، ترڅو په دواړو علمي نهادونو کې د علمي ودې او مسلکي ظرفيتونو د لوړولو زمينه لا نوره هم پياوړې شي.
همدارنګه د افغان نړیوال اسلامي پوهنتون د علمي چارو مرستیال دکتور عبدالواحد لياقت د دغه پوهنتون د موخو، علمي پروګرامونو او فعالیتونو په اړه معلومات وړاندې کړل.
نوموړي د دې هوکړه ليک لاسليک د علمي همکاريو د پراختيا او د دواړو پوهنتونونو ترمنځ د انجنيرۍ په برخه کې د علمي تجربو او تخصصي پوهې د تبادلې لپاره يو مهم او ارزښتناک ګام وباله او د علمي، څېړنيزو او ښوونیزو برخو کې يې د ګډو همکاريو پر دوام ټينګار وکړ.
په پای کې د دواړو پوهنتونونو رهبرۍ د دغه هوکړه ليک د مادو د پلي کولو په اړه پر خپلې ژمنې ټينګار وکړ او څرګنده يې کړه چې د ګډو همکاريو، د علمي تجربو د تبادلې او د شته ظرفيتونو د اغېزمنې ګټې اخيستنې له لارې به د انجنيرۍ په برخه کې د لوړو زده کړو، علمي څېړنو او نوښت د پرمختګ، پراختيا او ودې لپاره هر اړخيزې او دوامدارې همکارۍ ترسره کوي.
غونډه د هوکړه ليک په لاسليک او د دعایې په ویلو سره پای ته ورسېده.
