د کابل پولي تخنیک پوهنتون محصلینو لپاره څلور ورځنی دیني او اصلاحي سیمینار پیل شو
۳۰ ذوالقعدة الحرام ۱۴۴۷ مطابق ۲۷ ثور ۱۴۰۵
د یاد سیمینار د پرانیستې په غونډه کې د پوهنځیو رئیسانو، استادانو، کارمندانو او محصلینو ګډون کړی و.
د سیمینار په لومړۍ برخه کې د عمر بن الخطاب رضی الله عنه جامعې د حدیثو استاد ښاغلي شیخ محمد سرور محمدي د رسول اکرم صلی الله علیه وسلم د سنتو د پیروۍ، له پیغمبر صلی الله علیه وسلم سره د محبت او اطاعت د اهمیت، د فرد او ټولنې په اصلاح کې د سنتو د رول او په دنیا او آخرت کې د بریا پر ارزښت هر اړخیز او مفصل معلومات وړاندې کړل. نوموړي همداراز په ورځني ژوند کې د نبوي سنتو پر عملي کولو، د یووالي د پیاوړتیا، نېکو اخلاقو او د ځوانانو د سالمې روزنې په برخه کې د هغو پر اغېز ټینګار وکړ.
د سیمینار په دویمه برخه کې د کابل پوهنتون د شرعیاتو پوهنځي استاد ښاغلي شیخ عبدالحکیم قاسمي د وخت د ارزښت، له وخت څخه د اغېزمنې ګټې اخیستنې، د ژوند د فرصتونو په وړاندې د ځوانانو د مسئولیت او د وخت د ضایع کولو د زیانونو په اړه مفصلې او ارزښتناکې خبرې وکړې. نوموړي څرګنده کړه چې له وخت څخه سمه استفاده د علمي، دیني او ټولنیز بریالیتوب له مهمو لاملونو څخه ده او ځوانان باید له تعلیمي او علمي فرصتونو څخه سالمه او اغېزمنه ګټه پورته کړي.
د یادونې وړ ده چې دغه سیمینار د کابل پولي تخنیک پوهنتون د دعوت او ارشاد آمریت له لوري جوړ شوی او ټاکل شوې، چې د څلورو ورځو په جریان کې به د هېواد د جیدو علماوو او شیوخو له خوا محصلینو ته بېلابېل دیني، اخلاقي او اصلاحي موضوعات وړاندې شي.
