د لوړو زده کړو وزارت سرپرست وزیر د کابل پولي تخنیک پوهنتون د علمي شورا له غړو سره وکتل
غونډه د قرآنکریم د مبارکوآیاتونو په تلاوت سره پیل شوه.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال د لوړو زده کړو وزارت سرپرست وزیر ښاغلي شیخ الحدیث مولوي ندامحمد ندیم او ورسره پلاوي ته د ښه راغلاست وینا تر څنګ د یاد پوهنتون په اړه هر اړخیز راپور شریک کړ.
ښاغلي اقبال د خپلو ستونزو له جملې د لویې جرګې په تالار کې د غونډو پر مهال د محصلینو د رخصتیدو، د پولي تخنیک پوهنتون په انګړ کې د ۳۰۰ بستریز روغتون د سړک شتون، د محصلینو لپاره د لا ډېر عملي کار زمینه برابرول، د پوهنتون په داخل کې د ملي تدارکاتو د انسټیټیوټ شتون، د ټولګیو د لابراتوار تجهیزاتو او کتابخانې ستونزې او مشکلات له ښاغلي وزیر صاحب سره شریک کړل.
دغه راز د لوړو زده کړو وزارت سرپرست وزیر شیخ الحدیث مولوي ندامحمد ندیم د کابل پولي تخنیک پوهنتون له استادانو او رهبري څخه د هېواد د ابادۍ او په اسلامي او ملي روحیه د کدرونو او انجینرانو د روزنې په برخه کې د هغوی د هڅو له امله قدرداني وکړه.
همدا راز ښاغلي ندیم د یادو ستونزو د حل، د تدریسي او اداري بهیر د ښه والي، د استادانو د کمښت، د ماسټرۍ او دوکتورا پروګرامونو د پیاوړتیا، د استادانو د کتابونو د چاپ او د لابراتوارونو د مجهز کولو په برخه کې د هر اړخیزو همکاریو ژمنه وکړه نوموړي د اتو پوهنځیو د څانګو له آمرینو سره په جلا ناسته کې هغوی ته لارښوونه وکړه، چې له استادانو او محصلینو سره ښه چلند وکړي او د دوی ستونزې حل او پر وخت ورته رسیده ګي وکړي.
غونډه د دعایې په ویلو سره پای ته ورسیده.
