د لوړو زده کړو محترم وزیر ښاغلي شیخ مولوي ندا محمد ندیم او ورسره پلاوي د کابل پولي تخنیک پوهنتون څخه لیدنه وکړه.
غونډه د قرآنکریم د مبارکو آیاتونو په تلاوت سره پیل شول.
د ا.ا.ا د لوړو زده کړو وزیر ښاغلي شیخ مولوي ندا محمد ندیم، د لوړو زده کړو وزارت د کیفیت د تضمین رئیس ښاغلي مولوي شاکر وحیدي، د یاد وزارت ویاند ښاغلي ضیاء الله حشمي، مالي او اداري رئیس ښاغلي عبدالباري خپلواک او ورسره مل نورو لوړ رتبه او ټیټ رتبه مأمورینو د کابل پولي تخنیک پوهنتون څخه لیدنه وکړه.
په دې غونډه کې د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال، د یاد پوهنتون مالي او اداري معاون انجنیر سید مصباح الدین هاشمي، د علمي او اداري شورا غړو، د پوهنځیو رئیسانو، د څانګو آمرینو او د دغه پوهنتون یو شمېر استادانو او کارمندانو حضور درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال دغه پوهنتون ته د لوړو زده کړو وزیر او ورسره پلاوي د راتګ هرکلی وکړ. نوموړي د دغه پوهنتون له جوړېدو راهیسې د تاریخي، علمي او اکاډمیکو لاسته راوړنو او د انجینرانو د لیسانس او ماسټرۍ دورې د زده کړو په اړه هر اړخیزې خبرې وکړې. ښاغلي اقبال په مفصله توګه د دغه پوهنتون د امکاناتو، ظرفیتونو، ستونزو او اړتیاوو په اړه هم یادونه وکړه.
ورپسې د لوړو زده کړو وزارت مالي او حسابي رئیس ښاغلي عبدالباري خپلواک په خپلو خبرو کې د لابراتوارونو، د کتابتون د تجهیز او د پوهنتون د مالي او تخنیکي ستونزو د حل په اړه ډاډ ورکړ.
همدارنګه د ا.ا.ا د لوړو زده کړو وزیر محترم شیخ مولوي ندا محمد ندیم په خپلو څرګندونو کې له استادانو سره د لیدنې له امله خوښي څرګنده کړه. ښاغلي ندیم د استادانو او علمي اشخاصو په مقام او اهمیت بشپړ خبرې وکړې.
نوموړي د وړتيا او د کاري کيفيت په نظر کې نيولو سره د وړ استادانو په استخدام، هغوی ته د ټولو حقوقو په ورکړه، د دغه پوهنتون د ستونزو او مشکلاتو په هواري کې د هر راز همکاري ژمنه وکړه او زیاته یې کړه هغه استادان چې وظيفه یې پرې ایښې او له هیواد وتلي، د بیرته راستنېدو غوښتنه وکړه، تر څو د ولس او هېواد د خدمت جوګه وګرځي.
ورپسې یو شمېر استادانو خپل نظریات، ستونزې او وړاندیزونه د ورغلي پلاوي سره شریک کړل.
غونډه د دعایې په ویلو سره پای ته ورسید
په اخیر کې د لوړو زده کړو وزیر او ورسره پلاوي د پوهنتون له بیلابیلو برخو، لابراتوارونو او درسي صنفونو څخه لیدنه وکړه.