د کابل پولي تخنیک پوهنتون د فوټسال سیالیو اتلو لوبډلو ته د جایزو د ویش مراسم ترسره شول

مراسم د قرآنکریم د مبارکو ایاتونو په تلاوت سره پیل شول.

دغه مراسم چې لومړي، دویم او درېیم مقام لرونکو لوبډلو ته د جایزو د ویش او تقدیر په موخه جوړ شوي و، پکې د کابل پولي تخنیک پوهنتون د رهبرۍ غړو، یو شمیر آمرینو، استادانو او محصلینو ګډون کړی ؤ.‌
لومړی د کابل پولي تخنیک پوهنتون د محصلانو چارو مرستیال ښاغلي حافظ انجنیر عنایت الله رحیمي ټولو ته د ښه راغلاست وینا ترڅنګ، د ورزش په اړه د اسلام د سپیڅلي دین له نظره په تفصیل سره خبرې وکړې، ښاغلي رحيمي ورزش د روغتيا ضامن وباله او له ټولو محصلینو يې وغوښتل چې د سپورټ تر څنګ دیني مسولیتونو او مطالعې ته هم جدي پاملرنه وکړي.
نوموړي د دغه پوهنتون د ورزشي چارو له آمریت څخه د دې ډول پروګرامونو له امله مننه وکړه او د لومړي، دویم او درېیم مقام ټیمونو ته د مبارکي ترڅنګ، د بریالیتوب هیله څرګنده او د هر اړخیزې همکارۍ ژمنه یې وکړه.
دغه راز د کابل پولي تخنیک پوهنتون د ورزشي چارو آمر ښاغلي احمد فایق ضیايي د محصلینو لپاره د ورزشي پروګرامونو په لاره اچولو کې د پوهنتون د رهبرۍ له ملاتړ او همکارۍ څخه خوښي څرګنده کړه او ټولو ورزشکارانو ته یې د لا بریاوو هیله وکړه.
د یادونې وړ ده چې یادو سیالیو (15) ورځې دوام وکړ او (9) لوبډلو پکې برخه اخیستې وه، چې د جیولوجې او کانونو پوهنځي لوبډلې لومړی، د شپې ساختماني پوهنځی لوبډلې دویم او د کمپیوتر ساینس پوهنځی لوبډلې درېیم مقام خپل کړ.
مراسم د کپونو، ډالیو، ستاینلیکونو او مډالونو په ویشلو او د دعایې په ویلو سره پای ته ورسیدل.