په کابل پولي تخنیک پوهنتون کې د محصلینو د فراغت غونډه تر سره شوه د 8/1/1445 چې سمون لری د 4/5/1402 سره

غونډه د قرآنکریم  د مبارکو آیاتونو په تلاوت سره پیل شوه.

د کابل پولي تخنیک پوهنتون د محصلینو د پنځوسمې دورې د فراغت په مراسمو کې،  د ریاست الوزرا اداري مرستیال ښاغلي مولوي عبدالسلام حنفي، د لوړو زده کړو سر پرست  وزیر ښاعلي شیخ الحدیث مولوي ندا محمد ندیم، د لوړو زده کړو وزارت علمي معین ښاعلي دکتور لطف الله خیرخواه، د لوړو زده کړو وزارت د محصلانو چارو معین ښاغلي مفتي محمد طاهر احمد، د جامعاتو او تخصصاتو عمومي رئیس ښاغلي مولوي اسد الله فرید ،  د کابل پولي تخنیک پوهنتون رهبرۍ هیئت، استادانو، آمرینو او میلمنو ګډون درلود.

لومړی د کابل پولي تخنیک پوهنتون عمومي رئیس ښاغلي  پوهنوال دیپلوم انجنیر عبدالرشید اقبال په غونډه کې لوړپوړو چارواکو او میلمنو ته د ښه راغلاست تر څنګ پیلیزه وینا وکړه.

ورپسې د ریاست الوزراء اداري مرستیال ښاغلي  مولوی عبدالسلام حنفي د خپلو خبرو په ترڅ کې فارغ شویو محصلینو ته په ټولنه کې د خپلو مسوولیتونو یادونه وکړه او هغوی یې وهڅول چې، د هېواد د پرمختک لپاره کار وکړي او خپل ديني او ملي مسولیت سرته ورسوي.

ښاغلي حنفي فارغ شویو محصلینو ته ډاډ ورکړ چې، دوی ته به د کار زمینه برابر وي او هڅه کوي چې مسلکي اشخاص په نظام کې ځای پر ځای کړي.

نوموړي فارغ شویو محصلینو او د دوی کورنیو ته د دې ستر ویاړ مبارکي وویله.

همدا رنګه د لوړو زده کړو وزارت سرپرست وزیر ښاغلي شیخ الحدیث مولوي ندا محمد ندیم صاحب په خپلو خبرو کې فارغ شویو محصلینو ته د مبارکي تر څنګ هغوی ټولنې ته وړاندې کول یوه لویه لاسته راوړنه وبلله.

ښاغلي ندیم په خپلو خبرو کې یادو محصلینو ته  زیاته کړه : تاسو ته د ټولنې او هیوادوالو  سترګې دي، يوازې په لیسانس بسنه مه کوي، او خپلي زده کړې نوري هم تر سره کړي)). 

نوموړي فارغ شویو محصلینو ته ډاډ ورکړ چې دوی به په مسلکي برخو کي په کار ګماري او دې برخه کې هیڅ ستونزه نه وینی.

همداراز  په دې غونډه کې د لوړو زده کړو وزارت د محصلانو چارو معین ښاغلي  مفتي محمد طاهر احمد، د لوړو زده کړو وزارت علمی معین ښاغلي دکتور لطف الله خیرخواه،  د افغانستان د انجینرانو د ټولنې استازي ښاغلي  احمد ولید هویدا، د کابل پولي تخنیک پوهنتون د محصلانو چارو معاون ښاغلي  انجینر ویس الدین بریالي او د فارغ شويو محصلينو استازي ښاغلي انجینر کرامت الله احمدي د موضوع په اړه خبرې وکړې.

د یادونې وړ ده چې د کابل پولي تخنیک پوهنتون د اتو پوهنځیو او دوه دیرشو څانګو په درلودلو سره سږ کال 700 تنه انجنیران ټولنې ته وړاندې کړل. 

په اخیر کې غونډه فارغ شویو محصلینو ته د فراغت سندونو په توزیع کولو او دعایې ویلو سره پای ته ورسیده.