په کابل پولي تخنیک پوهنتون کې د «علمي لیکنې او په معتبرو نړیوالو علمي ژورنالونو کې د مقالو د خپرولو مهارتونو» درې ورځنی علمي سیمینار په حضوري او آنلاین بڼه پیل شو
د استادانو د علمي او څېړنیزو ظرفیتونو د لوړولو په موخه د «علمي لیکنې او په معتبرو نړیوالو علمي ژورنالونو کې د مقالو د خپرولو مهارتونو» تر عنوان لاندې درې ورځنی علمي سیمینار په حضوري او آنلاین بڼه د کابل پولي تخنیک پوهنتون د اوبو او چاپیریال ساتنې عمومي مرکز له خوا پیل شو.
د دغه پروګرام د پرانیستې په مراسمو کې د پوهنتون رهبري، د کابل پولي تخنیک پوهنتون او مرکزي پوهنتونو یو شمېر استادانو، محصلانو او مېلمنو په حضوري او د امارتي پوهنتونو یو شمېر استادانو په انلاین بڼه ګډون کړی و.
په پرانیستغونډه کې مولوي محمد موسی فاروق د دغه علمي پروګرام له جوړېدو څخه د خوښۍ څرګندولو ترڅنګ، د څېړنې، نوښت او علمي تولید پر اهمیت ټینګار وکړ او له استادانو څخه یې وغوښتل چې د علمي څېړنو په ترسره کولو او د خپلو څېړنیزو لاسته راوړنو په وړاندې کولو سره خپلې علمي پوهې او تجربې له علمي ټولنې سره شریکې کړي او د هېواد د علمي ودې او پرمختګ په برخه کې اغېزمن رول ولوبوي.
ښاغلي فاروق په معتبرو نړیوالو علمي ژورنالونو کې د علمي مقالو او څېړنو د خپرولو اهمیت ته په اشارې سره د دغه ډول علمي پروګرامونو جوړول د استادانو د علمي او څېړنیزو ظرفیتونو د لوړولو په برخه کې مهم ګام وباله.
ورپسې د کابل پولي تخنیک پوهنتون یو تن استاد دوکتور عبیدالله صالحي د پریزنټېشن له لارې د سیمینار د محتوا، د علمي لیکنې د اصولو او مهارتونو، د څېړنیزو مقالو د چمتو کولو د طریقې او په معتبرو علمي ژورنالونو کې د مقالو د خپرولو د بهیر په اړه هر اړخیز معلومات وړاندې کړل.
د سیمینار په وروستۍ برخه کې د مالیزیا هیواد د ملي پوهنتون استاد دوکتور ذوالفقار سعدي
په آنلاین بڼه په دغه سیمینار کې ګډون وکړ او د علمي مقالو د لیکلو او همدارنګه د مصنوعي ځیرکتیا (AI) د کارولو د طریقې په اړه یې خپلې علمي نظریې، تجربې او معلومات له ګډونوالو سره شریک کړل.
د یادونې وړ ده چې دغه پروګرام د افغانستان د اوبو عمومي څېړنیز مرکز له لوري د کابل پولي تخنیک پوهنتون د رهبرۍ په همغږۍ، جوړ شوی او د درېیو ورځو لپاره به د داخلي او یو شمېر نورو هیوادونو استادان او څېړونکې په حضوري او آنلاین بڼه د تدریس چارې دوام ولري.
