په کابل پولي تخنیک پوهنتون کې د څیړنیزو میتودونو، په نړیوالو ژورنالونو کې د مقالو لیکلو او خپرولو دوه ورځنی ورکشاپ جوړ شو. 26/12/1444
ورکشاپ د قرآنکریم د مبارکو آیاتونو په تلاوت سره پیل شو.
یاد ورکشاب چې د استادانو د مسلکي پراختیا آمریت له خوا جوړ شوی، پکې د کابل بولي تخنیک پوهنتون رهبري هیئت، د پوهنځیو رئیسانو، آمرینو او استادانو ګډون درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال په پوهنتونونو کې د څیړنو او د علم د تولید په اړه هر اړخیزي خبرې وکړې، او له ټولو استادانو یې وغوښتل چې دې برخې ته زیاته پاملرنه وکړي او دې ډول ورکشاپونو کې هر اړخیزه برخه واخلي، نوموړي په دې برخه کې د هر راز همکاري ژمنه وکړه
ورپسې د کابل پولي تخنیک پوهنتون علمي معاون ښاغلي انجنیر عنایت الله رحیمي په دغه ورکشاپ کې استادانو ته د ښه راغلاست وینا ترڅنګ د څیړنې پر اهمیت او د هیواد په پرمختګ کې د هغوی د رول په اړه خبرې وکړې او د دې ورکشاپ جوړیدل یې د استادانو لپاره اړین وګڼل.
په پای کې د استادانو د مسلکي پراختیا آمر ښاغلي پوهندوی محمد یونس وفا د ورکشاپ اجنډا په اړه معلومات وړاندې کړل.
د يادونې وړ ده، چې دغه ورکشاپ به دوه ورځې دوام لري چې د ساختماني پوهنځي رئیس ښاغلي پوهاند دوکتور امان الله فقیري او د نړیوال ژورنال آمر ښاغلي دوکتور احمد جواد نیازی به یې پر مخ وړي.
