په کابل پولي تخنیک پوهنتون کې د ځمکې د ښکته کېدو ( فرونشست ) په اړه علمي آنلاین سیمینار ترسره شو.
د علمي ظرفیتونو د لوړولو او د چاپېریالي ننګونو د کنټرول په اړه د پوهاوي د زیاتوالي په موخه د کابل پولي تخنیک پوهنتون د څیړنو او علمي مجلې معاونیت د ځمکنیو اوبو د نامناسب استخراج له امله په کلیوالي او ښاري سیمو کې د ځمکې ښکته کېدلو تر عنوان لاندې انلاین سیمینار ترسره کړ
یاد سیمینار د دغه پوهنتون د جیولوجي او کانونو او د اوبو او چاپېریال انجنیري پوهنځیو نږدې ۵۰ تنو استادانو او محصلینو ته هم مهاله په حضوري او آنلاین ډول د پوهنتون د IT تالار کې ترسره شو.
د سیمینار وړاندې کوونکی نجیبالله کاکړ د آلمان د پوسدام پوهنتون د دوکتورا محصل او د ناوری کمېټې څېړونکي خپلو تازه څېړنیزو موندنو ته په اشاره زیاته کړه چې له مخې یې د افغانستان په ښارونو او کلیو کې د ځمکنيو اوبو د بې سارې او غیر مسؤلانه استخراج له امله د ځمکې ښکته کېدل په بې ساري ډول زیات شوي دي.
د ښاغلي کاکړ د څېړنې له مخې، د نفوسو زیاتوالی، اقلیمي بدلونونه او د اوبو د مدیریت د مناسبو زېربناوو نشتوالی، د اوبو د زیرمو د زیات استخراج عمده عوامل دي. چې دغه عوامل په ځانګړې توګه په کابل او غزني ولایتونو کې د ځمکې د ښکته کېدو لامل شوي دي.
د غزني ولایت د دهیک ولسوالۍ په سیمه کې، د تېرو اوو کلونو په جریان کې د ځمکې ښکته کېدل ۸.۷۷ سانتي متره ثبت شوي، چې عمده لامل یې د کرنې لپاره د نویو تکنالوژیو له لارې د اوبو بېحده کارول بلل شوی دي.
همداراز، د څېړنې په ترڅ کې د کابل ښار د ځمکې د ښکته کېدو، د ځمکنیو اوبو د سطحې د کمېدو او باران د الګو ترمنځ مستقیمه اړیکه هم تر تحلیلي ارزونې لاندې نیول شوې ده.
ښاغلي کاکړ خبرداری ورکړ، که د اوبو زیرمې په پایدار ډول مدیریت نه شي نو دا به چاپېریال، کرنیزې سیمې او د هېواد بنسټیزې زېربناوې له جدي خطر سره مخ کړي.
نوموړي همداراز د کابل پولي تخنیک پوهنتون له استادانو او محصلینو سره د راتلونکو تحقیقې همکاریو لپاره خپل لیوالتیا څرګنده کړه.
یاد سیمینار د ګډونوالو له خوا په تود هرکلي سره بدرګه او د علمي او څېړنیزو پوښتنو په جوانو سره پای ته و رسید.
