په کابل پولي تخنیک پوهنتون کې د محصلینو د فوټسال سیالیو یوولسم پړاو پرانستل شو.
پروګرام د قرانکریم د مبارکو آیتونو په تلاوت سره پیل شو.
یاد پروګرام د کابل پولي تخنیک پوهنتون د فوټسال لوبډلې ته د غوره لوبغاړو د ټاکلو په موخه د دغه پوهنتون په ورزشي میدان کې ترسره شو.
په یاد پروګرام کې د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال، د کابل پولي تخنیک پوهنتون لپاره د لوړو زده کړو وزارت ځانګړي استازي مالي او اداري سرپرست مرستیال ښاغلي انجنیر سید مصباح الدین هاشمي، د لوړو زده کړو وزارت د ورزش عمومي مدیرښاغلي سید انورشاه سعادت، د پوهنځیو رئیسانو، استادانو، محصلینو، کارمندانو او ورزشکارانو ګدون درلود.
لومړی د دغه پوهنتون د ورزشي روزنې آمر ښاغلي احمد فایق ضیایي ټولو ته د ښه راغلاست ترڅنګ د یادو سیالیو په اړه معلومات وړاندي کړل، نوموړي زیاته کړه چې له یادو سیالیو څخه یې موخه په کابل پولي تخنیک پوهنتون کې د فوتسال سیالیو د غوره لوبغاړو ټاکنه ده، په یادو سیالیو کې به د ټولو پوهنځیو څخه لس ټیمونه برخه اخلي چې لومړی پړاو یې لس ورځي او دویم پړاو به یې درې ورځې په بر کې ونیسي.
ورپسې د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال د دغو سياليو په تر سره کېدو خوښي وښوده او ورزش يې محصلینو ته د زده کړو ترڅنګ یو ښه فرصت وبلی.
ښاغلي اقبال ورزش د ځوانانو د روغتیا او هوساینې ضامن او د محصلینو د ذهنونو او استعدادنو په پیاوړتیا کې مهم او ضروری یاد کړ. هغه وویل چې، د ورزش په برخه کې محصلینو سره همکاري او ملاتړ، د پوهنتون په دننه او بهر کې د رهبري هئیت او د ورزشي روزنې دیپارتمنت دنده ده.
همدارنګه د کابل پولي تخنیک پوهنتون لپاره د لوړو زده کړو وزارت ځانګړي استازي مالي او اداري سرپرست مرستیال ښاغلي انجنیر سید مصباح الدین هاشمي پر ورزش باندي د اسلام د مبارک دین له نظره خبرې وکړې، ورزش یې د هېواد د پرمختګ او هوساینې اساس او د ځوانانو د ذهن او بدن د روغتیا لپاره ګټور وباله.
ورپسې د لوړو زده کړو وزارت د ورزشي زده کړو عمومي مدیر ښاغلي سید انورشاه سعادت ورزش یې د ځوانانو ترمنځ د یووالي، خواخوږۍ وسیله وګڼله او د ورزشي پروګرامونو د تعقیب، پاملرنې او ملاتړ په اړه يې د لوړو زده کړو وزارت د سرپرست معین ښاغلي سید اسماعیل روحاني پیغام واورولو.
په پای کې د کابل پولي تخنیک پوهنتون د بشري سرچینو آمر قاضي محمد انس مجاهد په خوښۍ سره د یادو ورزشي سیالیو یادونه وکړه او د ناروغیو، خپګان او د نشه یي توکو په کنټرول او مخنیوي کې یې د ورزش په اهمیت خبرې وکړې.
د پروګرام په پای کې یادې سیالۍ د خیرپه دعا سره پیل شوې.
