د کابل پولي تخنیک پوهنتون علمي شورا غونډه ترسره شوه.
یاده ناسته چې د کابل پولي تخنیک پوهنتون عمومي رئیس مولوي محمد موسی فاروق په مشرۍ جوړه شوې وه، په کې د پوهنتون معاونینو، د پوهنځیو ریسانو او د علمي شورا غړو ګډون کړی و.
په پیل کې ښاغلي مولوي محمد موسی فاروق ګډونوالو ته د ښه راغلاست وینا ترڅنګ د علمي یووالي، د اکاډمیک جوړښت پیاوړتیا او د زده کړو کیفیت د ښه کولو پر اهمیت ټینګار وکړ.
نوموړي د نویو نړیوالو معیارونو سره سم د تعلیمي نصاب د معیاري کولو په اړه خبرې وکړې او له علمي شورا څخه یې وغوښتل چې د نصاب په اصلاح او نوي کولو کې جدي هڅې وکړي.
ښاغلي فاروق د دې ترڅنګ وویل چې د محدودو چپټرونو پر ځای د معتبر علمي کتابونو کارول د محصلینو د علمي کچې د لوړولو لپاره مهم ګام دی.
ښاغلي فاروق د عملي او ساحوي درسو د پلي کولو اهمیت یادونه وکړه او له استادانو یې وغوښتل چې د لابراتواري تجهیزاتو او نورو موجوده امکاناتو څخه مؤثره استفاده وکړي. که چېرې کومه ستونزه راولاړه شي، نو باید موضوع ژر تر ژره د پوهنتون له رهبری سره شریکه کړي.
نوموړي کابل پولي تخنیک پوهنتون د افغانستان په کچه د انجینرۍ د تعلیمي بنسټونو له ډلې څخه یو مخکښ بنسټ یاد کړ او له استادانو یې وغوښتل چې د علمي او اکاډمیکو معیارونو په عملي تطبیق سره د لوړو زده کړو وزارت قناعت ترلاسه کړي او د پوهنتون علمي اعتبار لوړ کړي.
په ناسته کې د تقرر، انفکاک، د ټولو صنفونو لپاره د علمي استازو ټاکنه، د پوهنځیو د چپټرونو او تعلیمي موادو د ارزونې کمیټو جوړول، د هیئتونو د تعین لپاره د پوهنتون او دولتي ادارو ترمنځ همکارۍ او نور اړوند موضوعات هم تر بحث لاندې ونیول شول.
د ناستې په پای کې د علمي شورا غړو خپلې نظریې او وړاندیزونه د علمي او اکاډمیک چارو په اړه وړاندې کړل. چې د اجرأ په موخه یې لازمې پریکړې او لارښوونې وشوې.
