د کابل پولي تخنیک پوهنتون د دوو تنو استادانو له خوا یوه علمي او څېړنیزه مقاله د سنګاپور هیواد سپرینګر نیچر (Springer Nature) نړیوال خپرندوی له خوا د "Water Conservation Science and Engineering" په نوم معتبر ژورنال کې، په 2.2 امپکت فکتور سره، خپره شوې ده
یاده مقاله د نوماند پوهنیار محمد تمیم ابراهیمي او پوهنمل ډاکتر عبدالحلیم زریاب لخوا د "د چټک اقلیمي بدلون په وړاندې د افغانستان د اوبو سرچینو باندې د اغېز لرونکو مهمو عواملو" تر عنوان لاندې چمتو شوې، چې انګلیسي عنوان یې دی:
"Key Drivers Impacting Water Resources of Afghanistan Under Rapid Climate Change Conditions".
دا مقاله د افغانستان د اوبو سرچینو د اندېښمنونکي وضعیت په اړه مستند او پراخ معلومات وړاندې کوي.
په مقاله کې د اقلیمي بدلونونو چټک پرمختګ، د باران کمښت، او د ښاري نفوس زیاتوالی څېړل شوی دی. څېړونکو د سپوږمکۍ انځورونو، هایدرولوجیکي معلوماتو، او د ځمکني اوبو د کچې په اړه شته معلوماتو په کارولو سره، په مهمو ولایتونو لکه کابل، هرات، کندهار، او مزارشریف کې د اوبو سرچینو د سخت فشار ښکارندويي کړې ده.
د څېړنې پایلې څرګندوي چې د بارانونو کموالی، د ځمکني اوبو د سطحې ښکته تلل، او د سطحې اوبو کمښت په دې ولایتونو کې د څښاک او کرنې د اوبو په تأمین کې جدي ستونزې رامنځته کړي دي.
څېړونکو خبرداری ورکړی چې د افغانستان د اقلیمي بدلونونو پر وړاندې، د لوړې سطحې او د اوبو د زیربناوو د کمزورتیا په نظر کې نیولو سره، که دغه حالت همداسې دوام وکړي، نو په نږدې راتلونکي کې به د اوبو او خوړو جدي بحرانونه رامنځته شي.
دغه مقاله د دولتونو اړوندو ادارو او نړیوالو سازمانونو لپاره یوه معتبره سرچینه کېدای شي، چې د افغانستان د اوبو سرچینو د پایداره مدیریت او پلان جوړونې لپاره ګټوره ثابته شي.
د کابل پولي تخنیک پوهنتون رهبري د دې علمي لاسته راوړنې په توګه، د پوهنتون د استادانو له خوا د مقالې خپرېدل په یو نړیوال ژورنال کې یوه ستره بریا بولي، او دا یې د پوهنتون د څېړنیزو وړتیاوو سمبول ګڼلی دی. هغوی خپلو استادانو ته د لا زیاتو علمي او څېړنیزو بریاوو هیله څرګندوي.
