د کابل پولي تخنیک پوهنتون د استادانو د مسلکي روزنې آمریت د محصل محوره تدریس تر عنوان لاندې ورکشاپ پیل کړ

ورکشاپ د قرآنکریم د مبارکو ایاتونو په تلاوت سره پیل شو.
لومړی د کابل پولي تخنیک پوهنتون د استادانو د مسلکي ودې آمر ښاغلي پوهندوی محمد یونس وفا د یاد ورکشاپ په اړه هر اړخیز معلومات وړاندې کړل او د دغه پوهنتون له مشرتابه څخه یې وغوښتل چې د ورکشاپ تر پایه له دغه آمریت سره همکاري وکړي.
همدارنګه د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال په ورکشاپ کې د استادانو حضور ته ښه راغلاست ووایه او د یاد آمریت له مسؤلینو څخه یې د ورکشاپ د دایرېدو له امله مننه وکړه.
ښاغلي اقبال د زده کړیالانو د عملي کار او زده کړې لپاره د محصل محوره طريقه سمه او ښه طريقه ياده کړه او استادان یې و هڅول تر څو په دې برخه لا ټینګار وکړي.
همدا راز د کابل پولي تخنیک پوهنتون مالي او اداري مرستیال ښاغلي مولوي محمد یاسین حقاني د استادانو لپاره د ورکشاپ له جوړیدو مننه وکړه او له استادانو یې وغوښتل چې محصلینو ته په اسلامي او اخلاقي روحیه تدریس وکړي او خپل مسوولیتونه د ورورولي په فضا کې په اسلامي روحیه ترسره کړي ښاغلي حقانی د کابل پولي تخنیک پوهنتون استادانو د مسلکي روزنې له آمریت سره د هر اړخیزو همکاریو ژمنه وکړه.
د يادونې وړ ده، چې دغه ورکشاپ به لس ورځې دوام وکړي، چې د استادانو د مسلکي روزنې آمریت له خوا به پر مخ وړل کیږي.