د لوړو زده کړو وزارت د کدري طبي پوهنتونونو لپاره د اکمال تخصص بستونو د آزموینې پروسه ترسره کړه
مراسم د قرآنکریم د مبارکو آیتونو په تلاوت سره پیل شول.
دغه مراسم د ابوعلي سینا او ننګرهارپوهنتونونو د تخصصي بستونو د بشپړولو لپاره د ازموینوپه اخیستلو سره پیل شول، د لوړو زده کړو وزارت مرستیال ښاغلی محمد اسماعیل روحاني ، د لوړو زده کړو وزارت ویاند ښاغلی مولوی خالقداد تقي ، د ملي ازموینو د ادارې مشر ښاغلی پوهاند عبدالقدیرخموش، د پولي تخنیک پوهنتون لپاره د لوړو زده کړو وزارت ځانګړی استازی ښاغلی انجینر زیارمل خطاب، د کابل پولي تخنیک پوهنتون عمومي رئیس ښاغلی پوهنوال عبدالرشید اقبال، علمي مرستیال ښاغلی پوهنوال محمد نسیم نسیمي، مالي او اداري مرستیال ښاغلي محمد انور نوري، د پوهنځیو رئیسانو، استادانو او کارکوونکو ګډون درلود.
د غونډې په پیل کې د لوړو زده کړو وزارت ځانګړي استازي ښاغلي انجینرزیارمل خطاب ګډونوالو ته د ښه راغلاست ترڅنګ يې د آزاد او خپلواک افغانستان په هکله خوښي څرګنده کړه او ټولو ګډونوالو ته یې د بریالیتوب هیله وکړه.
ورپسې ښاغلي پوهاند عبدالقدیرخموش د ملي ازموینو د ادارې مشر ټولو ګډونوالو ته د ښه راغلاست ترڅنګ د نوموړې پروسې په اړه معلومات ورکړل چې له 2896 ګډونوالو څخه 637 ښځينه او ۲۲۵۹ يې نارينه دي، له دې جملې څخه يوازې ۸۵ تنه چې ۵۵ تنه به يې د ابو علي سينا پوهنتون او ۳۵ تنه به يې د ننګرهار پوهنتون ته جذب شي.
همدارنګه د لوړو زده کړو وزارت مرستیال ښاغلي محمد اسماعیل روحاني د لوړو زده کړو وزارت په استازیتوب د افغانستان د آزادۍ د مبارکۍ ترڅنګ د لوړو زده کړو وزارت د پروګرامونو او پرمختګونو په اړه خبرې وکړې او د دغه ډول پروګرامونو له پیاوړتیا او تجهیز څخه یې خپل ملاتړ څرګند کړ. نورو طبي څانګو او د دغه ډول پروګرامونو پر روڼتیا یې ټینګار وکړ او ګډونوالو ته یې د بریالیتوب هیله وښوده.
