د کابل پولي تخنيک پوهنتون محصلینو ته له لنډ مهاله تقويتي ښونيزو پروګرامونو څخه د فراغت مراسم ترسره شول.
مراسم د قرانکریم د مبارکو ایاتونو په تلاوت سره پیل شول.
په یادو مراسمو کې د کابل پولي تخنیک پوهنتون رهبري، د لوړو زده کړو وزارت د محصلینو د خدمتونو او همغږۍ رئیس استاد کلیم الله محمدي، استادانو او محصلینو ګډون کړی و.
په پيل کې د کابل پولي تخنيک پوهنتون سرپرست رئیس انجنیر سردار ولي صالحي د ټولنې پر وړاندې د محصل پر مسؤلیتونو خبرې وکړې او هغوی یې خپلو ورځنیو درسونو او مسؤلیتونو ته متوجه کړل.
نوموړي له محصلینو وغوښتل چې دا ډول ښوونیز پروګرامونه تعقيب او ښه ګټه ترې پورته کړي.
ورپسې د لوړو زده کړو وزارت د محصلینو د خدمتونو او همغږۍ رئيس استاد کلیم الله محمدي محصلین و هڅول ترڅو د اسلامي نظام په ټینګښت او ملاتړ کې په پوره صداقت کار وکړي، خپل نیتونه د الله تعالی د رضا لپاره خاص کړي او زیاته یې کړه، چې په ښه نیت او بشپړ اخلاص سره کولای شو هم دنیا او هم آخرت جوړ کړو.
د یادونې ده، چې دغه لنډمهاله ښوونیز کورسونه د سکېچ اپ، اټوکېډ، آفیس پکېج او CNAA پروګرامونو په اړه په لاره اچول شوي وو، چې د دغه پوهنتون د بېلابېلو څانګو محصلینو ته د دوو میاشتو په اوږدو کې وړاندې شول، په پای کې ۲۵۰ تنه محصلین فارغ او خپلې تصدیق پاڼې یې ترلاسه کړې.
مراسم د دعایې په ویلو پای ته و رسېدل.
