د کابل پولي تخنیک او ښوونې او روزنې پوهنتونونو کارمندانو ته ښوونیز سیمینار جوړ شو
سیمینار د قرانکریم د مبارکو آیاتو په تلاوت سره پیل شو.
یاد سیمینار چې د کاري پلان جوړونې او د کمپیوټري پروګرامونو د زده کړې په موخه جوړ شوی، په کې د کابل پولي تخنیک او ښوونې او روزنې پوهنتونونو اداري کارمندانو ګډون درلود.
لومړی د کابل پولي تخنیک پوهنتون مالي او اداري مرستیال ښاغلي مولوي محمد یاسین حقاني د کارمندانو د ظرفیت لوړولو په موخه د دغه سیمینار د جوړیدل د عصري زده کړو او د اسلام د سپیڅلي دین له نظره ډیر مهم او ارزښتناک یاد کړ.
نوموړي د سيمينار له ګډونوالو وغوښتل، چې د ياد شوي سيمينار زده کړې ته جدي پاملرنه وکړي او د خپلو کاري چارو د سمون په موخه له زده کړو څخه په اغېزمنه توګه ګټه پورته کړي او په پوره صداقت ورته حاضري وکړي.
همدارنګه د لوړو زده کړو وزارت د ظرفیت لوړونې آمر ښاغلي عبیدالله مولایی د یاد سیمینار په پیلولو کې د کابل پولي تخنیک پوهنتون له همکارۍ څخه مننه او قدردانی وکړ او د سیمینار د محتوا په اړه یې هر اړخیز معلومات وړاندې کړل.
د يادونې وړ ده، چې دغه سيمينار لوړو زده کړو وزارت له خوا د کابل پولي تخنيک پوهنتون د بشري سرچینو او د معلوماتي ټکنالوژۍ آمریتونو په همغږۍ د کابل پولي تخنيک او ښوونې او روزنې پوهنتونونو د کارمندانو لپاره جوړ شوى، چې يوه اوونۍ به دوام وکړي.
